गहना खरिद गर्न सहयोग पुर्याउने एप्स ‘गहना बजार’

Technology Khabar १६ पुष २०७१, बुधबार

गहना खरिद गर्न सहयोग पुर्याउने एप्स ‘गहना बजार’

काठमाडौं, १६ पुस । ग्राहकलाई गहना छान्न पसलमै पुग्नुपर्ने बाध्यतालाई सहज बनाउन आइटी कम्पनी विधि प्रालिले नेपालमा पहिलो पटक गहनाबारे जानकारी दिने ‘गहना बजार’ एप्स सार्वजनिक गरेको छ ।  काठमाडौंका नाम चलेका गहना पसलका सुन तथा हिराका गहना छान्न पाउने सुविधा यस एपले मोबाइलमै उपलब्ध गराउने कम्पनीले प्रेस विज्ञप्तिमार्फत जनाएको छ ।

एन्ड्रोइड प्लेटफर्ममा उपलब्ध ‘गहना बजार’ मा उपभोक्ताले गहनाका विभिन्न डिजाइनका तस्बिर हेर्दै छान्न सक्नेछन् । यो एप्स आइओएस प्लेटफर्ममा यसै साता उपलब्ध हुने बताइएकोछ ।Screen Shot Gahanabazaar

गहना बजार एप प्ले स्टोरमा उपलब्ध भएको एक सातामै नौ हजारपटक डाउनलोड भइसकेको कम्पनीका प्रमुख कार्यकारी अधिकृत सुवास सापकोटाले बताएका छन् । यस एपमा आफ्नो क्षमता अनुसारका मूल्यका औंठी, नेकलेस, इयररिङ, पेन्डेन्ट, जन्तर, तिलहरी, टप, बेंगल, मंगलसूत्र, सिक्रीलगायतका गहना खोज्न सकिने छ ।

गहना बजार एपले ग्राहकले किन्ने गहनाको वास्तविक तौल, जर्ती र बनाउने ज्याला छुट्याएर हिसाव गर्ने तरिकासमेत सिकाउँछ ।

एप्समा दैनिक सुनको मूल्य आफैँ अपडेट हुन्छ । ग्राहकले सुनको मूल्य बुझ्न पसलेको भर पर्नु पर्दैन । त्यस्तै पसलको विश्वसनियताबारे एप्सबाटै बुझ्न सकिन्छ । एप्सबाटै दुई पसलका गहनाबीच तुलना गरेर गहना छान्न सकिने व्यवस्था राखिएकोछ । यस्तो सुविधा मोबाइलमा मात्र हैन, गहना बजारको वेबसाइटमा समेत उपलब्ध गरिएको सिइओ सापकोटाले जानकारी दिएका छन् ।

सो एप्समा गहनाका तस्बिरसहित सम्पूर्ण जानकारी पाउन सकिन्छ ।

‘ब्यस्त ब्यक्तिहरुलाई घरमै बसेर गहना छान्न सजिलो होस् भनेर यस्तो एप्प विकास गरेको सापकोटाले बताए । उनले यसलाई अन्तर्राष्ट्रिय बजारमा समेत विस्तार गर्ने योजना भएको जानकारी दिए । ग्राहक पसलमा गएर गहनाका डिजाइन छानेर बस्न सक्दैन । त्यस्तो बेला उसले मोबाइलमै सबै प्रकारका डिजाइन हेरेर पाइने पसलमा किन्न सक्छ ।

पसलमा गहना छान्न जानेहरुले गहना बजार एप्स आफ्नो मोबावाइलमा डाउनलोड गरेको देखाए गहना बनाउने ज्यालामा १५ प्रतिशतदेखि ३० प्रतिशतसम्म छुट पाउने ब्यवस्था मिलाइएको कम्पनीले जनाएकोछ ।

एप्समा शालिमार ज्वेलर्स, बराह ज्वेलर्स, गहना स्टोर्स र एलएम सुनचाँदी पसलका गहनाका डिजाइन समावेश गरिएको छ ।

प्रकाशित: १६ पुष २०७१, बुधबार

Comments are closed.

Loading...